វេទិការវាងពលរដ្ឋម្ចាស់ឆ្នោតនិងគណបក្សនយោបាយនៅខេត្តព្រះសីហនុ
ម្ចាស់ឆ្នោតជាង ១.៣០០នាក់ មកពីខេត្តក្រុងចំនួន៧ បានជួបជុំគ្នានៅក្នុងសមាជប្រជាជន នៅខេត្តព្រះសីហនុ ដើម្បីចោទសួរតំណាងគណបក្សនយោបាយចំនួន៣ គឺគណបក្សប្រជាជនកម្ពុជា គណបក្សសង្គ្រោះជាតិ និងគណបក្សហ៊្វុនស៊ិនប៉ិច ពីបញ្ហាទំនាស់ដីធ្លី បញ្ហានេសាទ បញ្ហាបាត់បង់មុខរបរ បញ្ហាសុំដំឡើងប្រាក់ខែជាដើម ដែលជាកង្វល់របស់ម្ចាស់ឆ្នោត។ ពួកគេស្នើសុំឲ្យគណបក្សនយោបាយមានវត្តមានចូលរួមប្រជុំនៅថ្ងៃនោះ ជួយដោះស្រាយបញ្ហាដែលបានលើកឡើង នៅក្រោយជាប់ឆ្នោត។ សមាជប្រជាជនក្រោមប្រធានបទស្ដីពីការចូលរួមធ្វើឲ្យមានការគោរព សិទ្ធិមនុស្ស និងប្រជាធិបតេយ្យពិតប្រាកដនៅកម្ពុជា បានប្រារព្ធនៅខេត្តព្រះសីហនុ ថ្ងៃទី១៩ ខែមិថុនា។ ក្នុងសមាជនោះ មានប្រជាពលរដ្ឋដែលមានបញ្ហាបាត់បង់ដីធ្លី ការបណ្ដេញចេញ ការបាត់បង់ចំណូលពីរបរនេសាទ របរដឹកភ្ញៀវទេសចរ ជាដើម បានបង្ហាញកង្វល់របស់គេជូនតំណាងគណបក្សនយោបាយចំនួន៣ មានគណបក្សប្រឆាំង និងគណបក្សកំពុងដឹកនាំរដ្ឋាភិបាល សុំឲ្យដោះស្រាយក្រោយចូលកាន់តំណែង។ ប្រជាពលរដ្ឋជាង ១.៣០០នាក់ មកពីច្រើនសហគមន៍នៃរាជធានីភ្នំពេញ ខេត្តកណ្តាល តាកែវ កំពត កោះកុង កំពង់ស្ពឺ និងខេត្តព្រះសីហនុ បានលើកពីបញ្ហាកង្វល់នោះ។…
